Lagerblog Skila 2025 Flumserberg

Freitag 07.02.2025 (5. Skitag)

Gester Abig händ mir «Computergames» gspilt, es isch okay bis sogar cool gsi, aber mir hend es bizzeli zwenig zit gha!

Denne sind mehr is Zimmer gange und hend versuecht zschlafe, aber gwüssi Buebe hend porbiert gha z schnäuzle (aber sie hends nöd gschafft). Am nächste Morge hend mir zum Glück en Halbstund länger schlafe chönne, sie hend eus wie immer mit Musik gweckt das het gstört. S Zmorge isch gsi wie fast jede tag.

Nach eusne Ämtlis sind mir uf d Pischte gange und hend alli zamme es spili gspilt. Findet Nemo hets gheisse, Ziel isch gsi usezfinde wer de Nemo isch. S Spielfeld sind alli Piste gsi wo zu nur genau eim Skilift gfüert hend. Uf de Pischte sind es paar Leiter underwegs gsi und wenn du en vo ihne gstellte Uftrag erfüllt hesch, hend sie dir en Tipp gäh wer de Nemo si chönt. D Leiter hend sich verkleidet und mer het sie müesse erkenne und denne ihre Name rüefe. Mir hend das Spiel de ganzi Morge gspilt und s Gfühl gha use gfunde z ha, wer de Nemo gsi isch, aber es isch de Fionn gsi drum hemmer leider nöd gune.

Zum Zmittag heds de normale Lunch gäh, d Rüebli sind rieeesigg gsi!!!! Am Namittag hend mer nomal es letzts Mal in eusne Gruppe fahre chöne und es isch mega MEGA MEGAAAA GUETTTTT gsi. Denne sind mer is Huus zrugg gange und hend leider müesse go packe. Es isch extrem unordenlich gsi und mir sind nöd so wit cho. Hüt Abig isch de Buntiabig und mer hed müesse esse mit andere lüt us em Lager (au mit Buebe ). Di meischte hend mir nöd kennt aber s Esse isch mega Fein gsi. Hüt Abig spiled mir warschinldich no so klassischi Lager Spieli.

Anina, 10 Jahre alt, Kadas 21

Wetter 9/10
Lagerstimmig 0/10 Buebe nerved
Esse 10/10 super gsi

Jana, 10 Jahre alt, Las bandidas

Wetter 10/10 heiss und sonnig
Lagerstimmig -1000/10 buebe nerved sehr sehr sehr fest
Esse 10/10 Burgerrrrr

Noah, 14 Jahre alt, $epiaz

Wetter 10/10
Lagerstimmig 8/10
Esse 12/10

Donnerstag 06.02.2025 (4. Skitag)

Am 7i am Morge simmer ufgweckt worde vo eusem Nachbar mit schlechter techno Musik. Den hets zum Zmorge Müesli gäh. S abwäsche isch sehr lang gange darum sind vieli gruppe spot uf d Piste cho. Be eus unde isch es sehr Näblig gsi wenn mehr mit em Bändli ufe gfahre sind isch d sunne führe cho. Piste sind gut gsi. Uf die 12i hets zmittag gäh. Es hät abnormal dicki Rüebli gäh. Nachher sim mer wieder uf’d Piste. E paar Goofe sind uf’d schnöre gheit. D’ältischte sind id Badi. Die Jüngere sind i dere Ziit no wiiter gfahre. Zrugg is Lagerhus simmer uf die 5i, uf die 6i hets denn Fotzelschnitte geh. Die sind mega fein gsi, Chuchi het gueti Arbeit gleisetet. D Chuchi allgemein isch sehr guet das Lager. Nachem Znacht hemmer chillt, bis de Max (nervige Leiter) cho isch und eus zum Lagerblog schriibe zwunge het (basiert eigentlich alles uf freiwillige Basis). Und glii gits super Computergames (kei bock).

Akas, 12 Jahre alt, Siorcs:

Wetter: 6/10 oben gut, unten schlecht
Lagerstimmung: 8/10 chönt besser si
Essen: 10/10

Julian, 11 Jahre alt, Siorcs:

Wetter: 7/10 oben gut, unten mitteldichter Nebel
Lagerstimmung: 9/10
Essen: 10/10, usserd Bohne, die hend alli zum furze bracht

Malena, 14 Jahre alt, 16er

Wetter: 7/10
Lagerstimmung: 9/10
Essen: 8/10

Stefanie, 15 Jahre alt, 16er:

Wetter: 6/10
Lagerstimmung: 8/10
Essen: 10/10

Mittwoch 05.02.2025 (Off-Day)

Gester hämmer Wellnessabig gah. Es hät en Kopfmassage Poste gha, en massage Poste, en Friseur Poste, es Handpelling und ein Poste wo mer het chöne Fingernägel ahmale. Es sind wildi Frisure entstande, ein Person hät sich öppis ziemlich freches rasiert. Es hät au es wildes Dessert geh (Yurrgurt mit Crumbels).

Zu Hüt, hüt hämmer euse off Day gha (bedütet kei Ski/Snowbord fahre will mer ih de Vergangeheit use gfunde hend, dass sich suscht endi Wuche vill lüt verletzted, wills nümme möged). Mir hend eh Stund länger döffe schlafe und ahschlüssend heds Poridge zum Zmorge geh. Mir händ am Vormittag Awaerness Pöste gmacht, wo es um Toleranz und anti Usgrenzig und so gange isch. Am Mittag heds Chilli sin Carne geh (das vom Arthur sinere Mueter isch feiner) aber schlecht isch es nöd gsi. Am Namitag hämer en Sportblock gah mit 6 verschidene Pöste. Dete hämer «Computergames», Parkour, Tanze und witeri Pöste gah und de Andor hed de Frisbee Poste am liebste gha, am Arthur hed Parkour am beste gfalle, will de am lustigste gsi isch. Die Gruppe wo die meiste Pünkt gsammlet hend chunt denne bim Casinoabig en gratis Drink über. Nachher hämer en chlini Pause gmacht und ahschlüssend Znacht gesse (Alpemacharone).

Jetzt simmer grad am Lagerblogg schribe und wärfed eus nacher in Schale für en coole Casinoabig.

Elena, 14 Jahre alt, Kalucos

Wetter: 8/10 ebiz kalt aber sehr sunnig
Lagerstimmung: 7/10 chömer ebiz verbessere
Essen: 10/10 wege de alpemacharone

Andor, 14 Jahre alt, Armaduras

Wetter: 7/10
Lagerstimmung: 9/10
Essen: 1.5/10 Wege em Zmitag und em Znacht

Arthur, pensioniert, Armaduras

Wetter: 8/10
Lagerstimmung: 9/10
Essen: 5/10 mid aber voll ok

Dienstag 04.02.2025 (3. Skitag)

Am Morge sind mir mit komischer (cooler) Musik (talahon musik) gweckt wurde. Denne simmer zwunge wurde ufzstah und Zmorge z esse. Mir hend d Skisache usegsuecht und hend eus parat gmacht. Bim abefahre hets eus gmuulet (Fabio, Vivienne), ich han en 360 gschafft (Ben) und ich bin abegheit (Maya). Skifahre isch super cool gsi, es het voll guet funktioniert. Die schwarzi Piste isch voll easy gsi. S Zmittag isch voll fein gsi, will es Hotdogs geh het und mir chönd es wieder mal mache, dass es Müesliriegel und Schoggi geh het. Ich han den no wölle e Chässchnitte esse, aber die isch leider nume für Vegetarische lüüt gsi (Vivienne).

Was isch nachher cho?? Ja wieder uf Piste, aber so öppe 10’000 mal umgheit. Aber am Nammittag ischs Skifahre okay gsi. Am halbi 4i simmer heicho, hend dusched und sind denn in Prima gange. Dötte hemmer e 2 Literfläsche Istee kauft (Fabio und Ben). Mir sind nachem Snowbaorde is Schwimmbad gange (Vivienne und Maya). Nachem Hallebad simmer alli no am Spiili spiele gsi und am Bändeli knüpfe. Und denne isch s Znacht gsi. S Znacht isch recht okay gsi, s Rösti isch ned ganz so fein gsi. Ämtli hemmer alli keini gha. Denn simmer zwunge wurde go Lagerblog schriibe und nachher gits no Dessert. S Abiigprogramm wüsse mer nonnig, nachher gömmer go schlafe.

Ben, 11 Jahre alt, Fuegos

Wetter: gut, 8/10 wege iis uf de Piste
Lagerstimmung: gut, 8/10
Essen: sehr gut, 8/10 wege de Sauce

Fabio, 12 Jahre alt, Fuegos

Wetter: 9/10 will d Piste immer hügeliger wurde sind
Lagerstimmung: 9/10
Essen: 10/10

Vivienne, 12 Jahre alt, Troja

Wetter: mega guet 10/10
Lagerstimmung: 7/10 wege Meinigsverschiedeheite
Essen: 8/10 Zmorge und Zmittag guet, Znacht ned eso

Maya, 12 Jahre alt, LasBandidas

Wetter: 10/10
Lagerstimmung: 9.5/10 eigentlich guet, aber ahstrengend
Essen: 8.5/10 Znacht gaht besser

Montag 03.02.2025 (2. Skitag)

Bim Atelierabig hend mer chöne vielfältig Sache mache wie z.B en Skilatrack schribe, Lego baue, Stadt Land Fluss spiele, Snowboard und ski wachse oder eifach zeichne. Nachem Atelierabig hend mer alli zeme ufgrumt und es het vo de Chuchi extra für eus es feins Dessert geh (selber gmachte Apfelstrudel). Nachem feine Dessert simmer zackig is Bett gange und sind natürlich wie jede Abig PÜNKTLICH go schlafe;)

Hüt am Morge simmer scho chli früener wach gsi, will vo irgend nem Gloon de Wecker glüte het. Darum isches scho öppe am 6:30 lut im Zimmer gsi. Nachem Zmorge hend mer grad döfe uf d Piste gah. Vo am 9:00 bis am 12:00 simmer ohni Pause duregfahre, bis wieder Versammlig bim Lagerhuus fürs Zmittag gsi isch.

Nachem Zmittag sind wider alli ufd Piste gange zum die schöni Namitagssunne z gnüsse. Eusi Gruppe isch echli uf allne Piste gfahre. Am meischte sind mer im Park und uf de PumpTrack Piste gfahre und hend neui Tricks glernt, meischtens hets eus aber es bizzeli umghaue aber verletzt het sich niemert, will mer zu vill STEEZZZ gha hend. Nachem Skifahre sind mer alli ziemlich kaputt gsi und sind erstmal go dusche und eus is Zimmer go usruhe. Öppe am 6i hets Znacht geh, es het Egg-friedrice geh es isch sehr fein gsi. Ich glaub s hüttige Abigprogramm isch «Computergame», will ichs vo irgendwo ghört han.

Tim, 14 Jahre alt, Armaduras

Wetter: 9/10
Lagerstimmung: 8/10
Essen: 10/10

Lina, 14 Jahre alt, Kalucos

Wetter: 9/10
Lagerstimmung: 8/10
Essen: 9/10

Sonntag 02.02.2025 (1. Skitag)

Gester abig hämmer es Gländ Game dusse im Schnee gspilt. Gruppe 5 het gunne und es het eus Spass gmacht. Als Belohnig hets feini Glace mit Himbeersauce geh:) Ahschlüssend hemmer ganz schnell müesse go schlafe, demit mer für de hütigi Tag guet usgrueht gsi sind. Am Morge simmer alli gweckt worde und hend zmorge gässe, damit mir schnell hend chönne ufd Piste. Es sind super Piste, es het mega schöns Wetter gha und alles hed mega toll usgseh mitem Schnee. D Stimmig isch super gsi und alli hend sich gfreut, chönne ski oder Snowboard z fahre. Am Mittag heds en feine Lunch geh. Nach em Lunch sind mer alli gsterkt zrugg ufd Piste gange und händ no es paar Stunde im Schnee uf de Ski und em Snowboard verbracht. Die wo nümme hend möge, sind denne en Punsch im Resti go trinke. Wo alli zrugg gsi sind und duscht hend, sind es paar Lüüt mit Leiter zemme in Kiosk gange. Bald druuf hetts Znacht geh und zwar Veginnuggets mit Riis und Spinat.

Denne hemmer euses Ämtli gmacht und sind denn go de Lagerblog schriibe. Mir wüsseds nonig so ganz, aber denked dass es nachher en Atelier abig wird geh.

Anakin, 13 Jahre alt, Siorcs

Wetter: 10/10
Lagerstimmung: 7/10
Essen: 7/10

Alva, 12 Jahre alt, Trojax

Wetter: 10/10
Lagerstimmung: 9/10
Essen: 7/10

Cilia, 13 Jahre alt, Trojax

Wetter: 10/10
Lagerstimmung: 8.5/10
Essen: 6.5/10

Samstag 01.02.2025 (Anreisetag)

De Robin isch am Morge ganz früeh ufgstande. Öppe am 5i (gfühlt). D Smilla isch erst uf die 9i ufgstande. Bim Zmorge esse hend sich beidi scho voll ufs Lager gfreut. Packt isch alles scho gsi. D Smilla het sich no vo ihre Katz verabschieded, de Robin isch no be sine Grosseltere gsi. Denn sinds beidi mit ihrne Eltere zum Werkk cho. Gseh hend sie sich ned, wills soviel lüüt gsi sind. Denn hend sie sich beidi vo allne verabschieded und sind mitem Car los. Smilla isch nebe de Anina ghockt, de Robin nebem Max. Beide hend viel gässe. D Fahrt het sich lang angefühlt, aber d Smilla het die ganz Fahrt fünf freunde gluegt. Am Robin hend Berge recht gfalle wo er sie gseh het. Wo mer denn acho sind, hend alli mitenand gspielt, aber fürd Smilla, sind alli Spieli recht plötzlich fertig gsi. Smilla het denn vorem Robin is huus döffe. D Smilla het gseit das Zimmer recht gross sind (12er-Zimmer). De Robin findet Zimmer an sich cool, mitbewohner nonig so. De Robin het de salat ned so gern gha und d Nudle sind zwar fein gsi, aber bizeli scharf. D Smilla hets ganze Essen gern gha. Nachem Znacht het d Smilla müsse s WC und d duschi putze. Vorem Esse het Skilaleitig no d Regle und de Ämptliplan erklärt. Nachem Znacht hemmer denn de Lagerblog gschribe. Nacher gits denn no es Gländgame, woruf sich beidi freuet. Danach gahts au scho is Bett

Robin, 8 Jahre alt, Ex-Kadas

Wetter: gut, 10/10
Lagerstimmung: gut, 8/10
Essen: gut, 10/10(Salat 1/10)

Smilla, 9 Jahre alt, Kadas-21

Wetter: gut, 8/10
Lagerstimmung: 10/10
Essen: gut, 8/10